死亡 上卷

細細個，我就成日諗＂死＂呢樣野。
唔係諗自己點死，係諗＂死＂到底係點？死者死嘅時候辛苦嗎？咁係咪黑媽媽之後就乜都冇架喇？定係仲存在向同在生者一樣嘅世界？定會去另一個世界？咁係咪有地獄有天堂？又有輪迴？咁向天堂做乜架？地獄又點架？可唔可以閃架？咁點解又要輪迴呀？咁若生死有命，命運又有定，咁仲有乜好做呀？反正都有"主宰"架啦。即係一出世就等上天堂或落地獄，中間過程冇得點話事，或你以為自己話緊事但其實結局都係一樣。即一出世，就比唔知邊個玩緊？

果時接觸＂死亡＂一般係透過觀察自己寵物瓜柴嘅過程或透過電視，電視方面主要係黎自警訊節目。然後先知，除左自然死，病死外，有d死亡係可以人為架。如他殺，意外。我好好奇佢地死之前係點？驚嗎？睇到嘅景象係乜？好多時諗諗下就諗到頭皮發麻。成晚訓唔到。當然，亦好擔憂，有日，身體疼愛嘅人，要經歷一樣唔知點樣嘅事。而呢樣野，似乎又係眾多向學校學唔到嘅野其中嘅一樣。（我果個年代唔會有性教育，而其中一個好重要嘅課題，去到今時今日都冇！果樣叫理財概念。）anyway,死亡向社會入面都好似禁忌咁。（好人好姐，講乜鬼野死丫。而且冇人識得講呢樣野。試問，我d問題邊鬼個識答？）

到大大下，我依然係對＂死亡＂懷有好多問號同恐懼。但同時又有d嚮往。果陣自身價值低，唔知係咪大部分青少年都係咁？捱過就曉大？即好似某d動物嘅＂自殺行為＂咁，其實背後係因為＂生存＂？記得大概向我12，13歲果年，開始興起自殺文化，果時真係好想了解下究竟係點。亦由果陣上左鋪＂自殘＂癮。再抵死d嘅係，我竟然覺得好舒服！(如今我能解釋，身心同源)繼後，當自己覺得自己吾能夠承受某d野時，就會想一死了之。咩養育之恩呀，其他人唔捨得呀，等等嘅諗法，我會用四字回應：關我叉事。由其係我有個＂整定＂論。（前面講果堆）由於咁樣，自然認為呢個世界冇野玩，咁死由自己決定唔係好d咩？更痴線嘅一個念頭係咁:係喎！諗諗下，死起碼叫有得揀，咁不如揀最開心果日死啦！（呢個諗法，我曾經同一個好朋友分享過）朋友隨即問我：點解？我答：我可以帶住快樂死囉！最開心果日喎，起碼bye bye果日我好happy丫! At the end 都咁happy,難得呀。我朋友再追問：你點知果日係最開心？咁如果果日嘅聽日，後日，或者是但一日更開心呢？我答：唔知架，但果刻我認為已經係最開心果日就夠啦！
明顯地，向呢個問答上，最後我堅持我認為嘅，佢亦堅持佢嘅唔認同。佢唔認同唔係死唔死呀，而係＂最開心果日＂嘅定義係如何。家下諗返，我好開心我身邊竟然有呢個＂不正常＂朋友可以同我講呢d話題。果年，我16歲。